خطوات عملية لاختيار المجال الوظيفي المناسب

10 خطوات علشان تختار المجال الوظيفي الأنسب ليك:

1- اعرف نفسك
إيه هي شخصيتك، مهاراتك، قيمك، قدراتك الحاجات دي ببساطة بتعرفك إزاي تختار الأنسب ليك واللي هيمشي معاك بناء على ميولك. وممكن تعمل ده بكل بساطة عن طريق مواقع كتير مجانية موجودة على الإنترنت.

2- وصل الخطوط ببعض
دور على الوظايف اللي ممكن تناسب نتايج الخطوة الأولى واعمل قايمة بيهم واقعد فلترهم واحدة واحدة بعد باقي ما تخلص باقي الخطوات.

3- اعمل بحث وظيفي واسع
من فترة للتانية اقرأ عن أكثر الوظايف دخلاً وأكثر انتشاراً وإيه من الوظايف دي ممكن يناسبك، اعمل عصف ذهني وبحث متوسع علشان تتطلع أكبر قدر من الإختيارات.

4- إسأل خبراء المجالات
ممكن تسأل حد خبير في مجال معين عن مستقبل المجال وحجم الطلب عليه وإزاي تبدأ في مجال بعينه وإزاي تقدر تنجح فيه.

5- اتطوع
من أحسن الوسايل والطرق لإسكتشاف مجال مُعين وأيضاً اكتشاف نفسك هو التطوع سواء في جمعايت خيرية أو مؤسسات عمل مدني، التطوع هو أفضل تجربة لمقارنة المناسب بغير المناسب من الوظايف.

6- اعمل القايمة الأخيرة
بعد كل خطوات السابقة المفروض تعمل قايمة أخيرة بالوظايف المُحتملة اللي يتوفر فيها عناصر (الرغبة – القدرة – الفرصة) وسيبك من الرغبة في الأول.

7- تحليل الفجوة
دي الخطة العملية الأولى اللي هتحطك على أول الطريق وهي إنك هتجيب مجال مجال وتحلل ما بين نقطتين
اللي عندك واللي المجال محتاجه من علم ومهارات وسلوك واللي هيطلعلك من التحليل ده هتحطه في الخطة.

8- اعمل خطتك علطول
مجرد ما تخلص تحليل الفجوة وتعرف اللي ناقصك بالظبط لازم تبدأ بعمل خطتك المهنية ولازم تكون متضمنة تاريخ كتابتها واسم المجالات الوظيفية وإيه اللي محتاجه تتعلمه علشانهم ؟ وإزاي؟ وامتى؟

9- اعمل بحث وظيفي مخصص
ده دور انك تبدأ تدور على محركات البحث أو على السوشيال ميديا عن إعلانات وظايف أو تدريب للمجالات دي علشان تقدر تستكشف المجالات دي بشكل عملي.

10- اسعى لأول تدريب في شركة
التجربة دايماً هي الميزان وهي اللي هتعرفك بنتايج ملموسة المجال ده مناسب ليك ولا لأ، واستغل دايماً أول 5 سنين إنك تبني لنفسك التصور الكامل لمجال بعينه هتكمل فيه ويا سلام لو السنين دي كانت سنين الكلية.

والأهم من كل ده إنك تصبر على نفسك بإنك تدي لنفسك وقت كافي لاستكشاف المجالات المناسبة.